एम के गौतम व विजय शिंदेला अष्टपैलू खेळाडूचा पुरस्कार
फलटण टुडे (भुवनेश्वर, ११ जाने ).: –
अल्टीमेट खो-खोच्या सीझन २ मध्ये आजच्या पहिल्या उपांत्य फेरीच्या सामन्यात गुजरात जायंट्स व ओडिशा जगरनॉट्समध्ये प्रचंड धुमचक्री पहायला मिळाली. गुजरात जायंट्सने यजमान ओडिशा जगरनॉट्सवर रोमहर्षक सामन्यात २ गुणांनी विजय हिसकावून आणला. तर चेन्नई क्विक गन्सने तेलगु योध्दासवर ३१-२९ असा थरारक विजय साजरा करत जवाहरलाल नेहरू इनडोअर स्टेडियमवर जल्लोष साजरा केला. हे सामने कटक येथील जवाहरलाल नेहरू इनडोअर स्टेडियमवर सुरु आहेत. आजच्या सामन्यामध्ये एम के गौतम व विजय शिंदेला अष्टपैलू खेळाडूचा पुरस्कार देऊन गौरवण्यात आले.
या सामन्यात गुजरात जायंट्सने व ओडिशा जगरनॉट्सवर २९-२७ असा दोन गुणांनी रोमहर्षक सामन्यात विजय मिळवत अल्टीमेट खो-खोच्या सीझन २ मध्ये अंतिम फेरीत पोहोचणारा पहिला संघ ठरला. नेहमीपेक्षा थोडी वेगळी रणनीती आखत ओडिशा जगरनॉट्सने नाणेफेक जिंकून प्रथम आक्रमण घेतले तर गुजरात जायंट्सला संरक्षणासाठी आव्हान दिले.
शेवटच्या व चौथ्या टर्न वेळी ओडिशा जगरनॉट्सने गुजरातवर २४-१९ अशी ५ गुणांची नाममात्र आघाडी घेतली व हे आव्हान गुजरात जायंट्स साठी अवघड नव्हते. ओडिशा जगरनॉट्सच्या एम के गौतम व दिलीप खांडवीने शेवटी शेवटी दिलेल्या जोरदार लढतीने हा सामना रोमहर्षक ठरला. ओडिशा जगरनॉट्सच्या पहिल्या तुकडीतील दिपेश मोरेला सुयश गरगटेने स्वस्तात बाद केले, ओंकार सोनवणेला पबनी साबरने आकाशीय सूर मारत तर बी. निखीलला संकेत कदमने सहज स्पर्शाने बाद केले व हि तुकडी ३ मिनिटात बाद झाली. दुसऱ्या तुकडीतील विशालला संकेत कदमने सहज, एम के गौतमला सुयश गरगटेने सहज स्पर्शाने बाद केले त्यापूर्वीने एक ड्रीम रन मिळवून दिला. दिलीप खांडवीने दोन ड्रीम रन्स मिळवून देत नाबाद राहिला. पण त्यापूर्वीच गुजरात जायंट्सने ओडिशा जगरनॉट्सवर २९-२७ असा दोन गुणांनी रोमहर्षक सामन्यात विजय मिळवत अल्टीमेट खो-खोच्या सीझन २ मध्ये अंतिम फेरीत पोहोचणारा पहिला संघ ठरला व त्याच बरोबर पहिल्या सीजन मध्ये झालेल्या पराभावाच बदला सुध्दा घेतला.
त्यापूर्वी झालेल्या पहिल्या टर्नमध्ये ओडिशा जगरनॉट्सने पॉवर प्लेने सुरवात केली गुजरातच्या पहिल्या तुकडीतील सुयश गरगटेला (२ मि. संरक्षण), शुभम थोरातला (१.५० मि. संरक्षण) एम के गौतमने सहज स्पर्शाने बाद केले. त्यापूर्वी शुभमने संघाला ४ ड्रीम रन्स मिळवून दिले. दिपक माधवला सुध्दा एम के गौतमने सहज स्पर्शाने बाद केले मात्र दिपकने सुध्दा एक ड्रीम रन मिळवून दिला व पहिली तुकडी ५.१३ मि. बाद झाली. दुसऱ्या तुकडीतील पी. नरसय्याला अविनाश देसाईने स्तंभात तर राम मोहनला सुशांत काळढोणेने सहज स्पर्शाने बाद केले व त्यावेळी ओडिशा जगरनॉट्सने गुजरातवर १०-५ अशी ५ गुणांची नाममात्र आघाडी घेतली.
दुसऱ्या टर्न मध्ये गुजरात जायंट्सच्या दमदार आक्रमण सुरु केले. ओडिशा जगरनॉट्सच्या पहिल्या तुकडीतील विशालला सहज स्पर्शाने तर दिलीप खांडवीला राजवर्धन पाटीलने स्तंभात व एम के गौतमला सुयश गरगटेने सहज बाद करत पहिल्या तुकडीचा सफाया २.४१ मि. केला व दुसऱ्या तुकडीतील अविनाश देसाईला व्ही. सुब्रमणिने सहज स्पर्शाने, सुशांत काळढोणेला संकेत कदमने सहज स्पर्शाने, तर रोहन शिंगाडेला सुध्दा लवकर बाद करण्यात गुजरात जायंट्सने यश मिळाले व हि तुकडी ५.२२ मिनिटात बाद झाली. तर मनोज कुमारला सुध्दा लवकर बाद करण्यात गुजरात जायंट्सने यश मिळाले. मध्यंतराला गुजरात जायंट्सने ओडिशा जगरनॉट्सवर १९-१० अशी ९ गुणांची आघाडी घेतली.
मध्यंतरानंतर तिसऱ्या टर्न मध्ये ओडिशा जगरनॉट्सने गुजरात जायंट्सच्या पहिल्या तुकडीतील फैजंखा पठाणला अविनाश देसाईने आकाशीय सूर मारत, अभिजित पाटीलला मनोज पाटीलने सहज स्पर्शाने तर कर्णधार अक्षय भांगरेला कर्णधार दिपेश मोरेने सहज स्पर्शाने बाद करत एक ड्रीम रण वाचवला व हि तुकडी ३ मिनिटात बाद झाली. दुसऱ्या तुकडीतील व्ही. सुब्रमणिला अविनाश देसाईने आकाशीय सूर मारत, पबनी साबरला दिपेश मोरेने सहज स्पर्शाने, तर संकेत कदमला (१.१३ मि. संरक्षण) दिलीप खांडवीने सहज स्पर्शाने बाद केले व हि तुकडी ५.०६ मिनिटात बाद झाली. तर तिसऱ्या तुकडीतील सुयश गरगटेला सुशांत काळढोणेने आकाशीय सूर मारत बाद केले.
या सामन्यात संकेत कदमला उत्कृष्ट आक्रमक, सुयश गरगटेला उत्कृष्ट संरक्षक तर एम के गौतमला अष्टपैलू खेळाडूचा पुरस्कार देऊन गौरवण्यात आले.
आज झालेल्या दुसऱ्या उपांत्य फेरीच्या सामन्यात ३१-२९ असा थरारक सामन्यात २ गुणांनी विजय मिळवला. तेलगु योध्दासने नाणेफेक जिंकून प्रथम आक्रमण घेतले व चेन्नई क्विक गन्सला संरक्षणा साठी आमंत्रित केले. दुसऱ्या उपांत्य फेरीच्या सामन्यात रामजी कश्यपची कडवी लढत प्रतिक वाईकरच्या अष्टपैलू खेळीला टक्कर देत व मध्यंतराला तेलगु योध्दासने चेन्नई क्विक गन्सवर घेतलेल्या ३ गुणांची आघाडी उधळून लावत चेन्नई क्विक गन्सने तेलगु योध्दासवर ३१-२९ असा थरारक सामन्यात २ गुणांनी विजय मिळवला.
शेवटच्या व चौथ्या टर्न मध्ये तेलगु योध्दासने चेन्नई क्विक गन्सला २९-१७ असे १३ गुणांचे आव्हान दिले होते तर तेलगु योध्दासला अजून ड्रीम रन्स वाढवण्याचे लक्ष होते. तेलगु योध्दासच्या पहिल्या तुकडीतील सौरभ आडवकरला विजय शिंदेने व अरुण गुणकीला आकाशीय सूर मारत, तर विजयभाई वेगडला सुरज लांडेला आकाशीय सूर मारत बाद केले व या तुकडीचा २.३२ मिनिटात चेन्नई क्विक गन्सने सफाया केला. दुसऱ्या तुकडीतील मिलिंद चावरेकरला आकाश कदमने आकाशीय सूर मारत, प्रसाद राडियेला रामजी कश्यपने सहज स्पर्शाने तर किरण वसावेला सुरज लांडेने आकाशीय सूर मारत बाद केले व हि तुकडी ५.२५ मिनिटात बाद झाली. तिसऱ्या तुकडीतील अवधूत पाटीलला लक्ष्मण गवसने आकाशीय सूर मारत बाद केले व चेन्नई क्विक गन्सने तेलगु योध्दासवर ३१-२९ असा थरारक विजय साजरा करत जवाहरलाल नेहरू इनडोअर स्टेडियमवर जल्लोष साजरा केला.
तत्पूर्वी या सामन्यातील पहिल्या टर्न मध्ये चेन्नई क्विक गन्सच्या पहिल्या तुकडीतील रामजी कश्यपला प्रतिक वाईकरने स्तंभात, विजय शिंदेला राहुल मंडलने आकाशीय सूर मारत तर मदनला प्रतिक वाईकरने सहज स्पर्शाने बाद केले मात्र त्यापूर्वी मदनने २ ड्रीम रन्सचे गुण मिळवून दिले व हि तुकडी ३.३४ मिनिटात बाद झाली. दुसऱ्या तुकडीतील सुमोन बर्मनला सहज स्पर्शाने तर आदित्य कुदळेला स्तंभात प्रतिक वाईकरने लागोपाठ तर लक्ष्मण गवसला अरुण गुणकीने स्तंभात बाद केले व हि तुकडी ५.४६ मिनिटात ढेर केली. तिसऱ्या तुकडीतील दुर्वेश साळुंकेला प्रतिक वाईकरने आकाशीय सूर मारत बाद केले. या टर्नच्या शेवटी तेलगु योध्दासने चेन्नई क्विक गन्सवर १४-२ अशी १२ गुणांची आघाडी घेतली.
दुसऱ्या टर्न मध्ये चेन्नई क्विक गन्सने जोरदार आक्रमण करताना पॉवर प्लेने सुरवात केली व तेलगु योध्दासच्या पहिल्या तुकडीतील अवधूत पाटीलला (१.५६ मि, संरक्षण) आदित्य कुदळेने सहज स्पर्शाने, प्रतिक वाईकरला लक्ष्मण गवसने आकाशीय सूर मारत बाद केले मात्र त्या पुर्वी प्रतिकने एक ड्रीम रन मिळवून दिला. २ ड्रीम रन्सचे गुण मिळवून देणाऱ्या आदित्य गणपुलेला (१.२४ मि. संरक्षण) रामजी कश्यपने आकाशीय सूर मारत बाद केले व हि तुकडी ४.१० मिनिटात बाद झाली. दुसऱ्या तुकडीतील आकाश तोगरेला दुर्वेश साळुंकेने स्तंभात, राहुल मंडलला आकाश कदमने आकाशीय सूर मारत तर ध्रुवला दुर्वेश साळुंकेस्तंभात बाद केले व मध्यंतराला तेलगु योध्दासने चेन्नई रक्विक गन्सवर १७-१४ अशी ३ गुणांची आघाडी घेतली.
मध्यंतरानंतर तिसऱ्या टर्न मध्ये चेन्नई क्विक गन्सच्या पहिल्या तुकडीतील अमित पाटीलला प्रतिक वाईकरने आकाशीय सूर मारत, आदर्श मोहितेला अरुण गुणकीने सहज स्पर्शाने तर आकाश कदमला आदित्य गणपुलेने सहज स्पर्शाने बाद केल व पहिली तुकडी २.११ मिनिटात बाद झाली. दुसऱ्या तुकडीतील रामजी कश्यला (१.५८ मि, संरक्षण) ध्रुवने सहज स्पर्शाने, मदनला प्रतिक वाईकरने स्तंभात बाद केले पण त्यापूर्वी मदनने एक ड्रीम रन्स मिळवून दिला. तर विजय शिंदेला (१,०४ मि, संरक्षण) ध्रुवने सहज स्पर्शाने बाद केले त्यापूर्वी विजयने २ ड्रीम रन्सचे गुण मिळवून दिले व हि तुकडी ६.२९ मिनिटात बाद झाली.
या सामन्यात प्रतिक वाईकरला उत्कृष्ट आक्रमक, रामजी कश्यपला उत्कृष्ट संरक्षक तर विजय शिंदेला अष्टपैलू खेळाडूचा पुरस्कार देऊन गौरवण्यात आले.