खोद काम व खडीकरण, डांबरीकरण कामाचा शुभारंभ करताना श्रीमंत रामराजे नाईक निंबाळकर शेजारी आ. दिपकराव चव्हाण व अन्य मान्यवर.
फलटण दि. ३ (फलटण टुडे वृत्तसेवा ) :
फलटण शहरातून जाणाऱ्या रिंग रोडवर डी. एड. चौक – डॉ. विजयराव बोरावके बंगला – लाकडी चौक या भागातील रस्त्याचा चढ कमी करण्याची आवश्यकता लक्षात घेऊन सदरचे काम करण्याचा निर्णय घेण्यात आल्याचे मा. ना. श्रीमंत रामराजे नाईक निंबाळकर सभापती विधान परिषद महाराष्ट्र राज्य यांनी निदर्शनास आणून दिले आहे.
सदर कामाचे भूमीपूजन व कामाचा शुभारंभ श्रीफळ वाढवून व टिकाव टाकून सभापती विधान परिषद महाराष्ट्र राज्य मा.ना. श्रीमंत रामराजे नाईक निंबाळकर, आ. दिपकराव चव्हाण ( फलटण – कोरेगाव मतदार संघ ) यांच्या शुभहस्ते समारंभपूर्वक करण्यात आला. त्यावेळी डॉ. रसाळ, माजी नगराध्यक्ष पांडुरंग गुंजवटे, सुदामराव मांढरे, किशोरसिंह नाईक निंबाळकर, हेमंत बोरावके,अजय माळवे , सनी अहिवळे, , दादासाहेब चोरमले , राहुल निंबाळकर, परशूराम तावरे, तेजसिंह भोसले, राजू निकम यांच्या सह शहरवासीय नागरिक उपस्थित होते.
महाराष्ट्र सुवर्ण जयंती नगरोत्थान योजना (जिल्हास्तर) सन २०२१ – २२ मधून या कामासाठी सार्वजनिक बांधकाम विभागाच्या माध्यमातून ९२ लाख, २८ हजार, ५६७ रुपये खर्च करण्यात येत असून सदर कामाची निविदा प्रक्रिया सार्वजनिक बांधकाम खात्याच्या माध्यमातून पूर्ण करण्यात आली असल्याचे यावेळी आ. दिपकराव चव्हाण यांनी निदर्शनास आणून दिले आहे.
ईगल कन्स्ट्रक्शन यांना सदर कामाची वर्क ऑर्डर देण्यात आली असून ६ मीटर रुंदीने सुमारे दीड मीटर पर्यंत खोल खोदकाम करुन डी. एड. चौक – डॉ. बोरावके बंगला – लाकडी चौक या मार्गाचे खोदकाम पूर्ण झाल्यानंतर खडीकरण, डांबरीकरण करुन क्रांतिसिंह नाना पाटील चौकाकडून येणारी सर्व प्रकारची वाहने सहजरित्या पुढे जाण्यात येणाऱ्या अडचणी दूर करण्यासाठी सदर रस्त्याचा चढ कमी करण्यात येत असल्याचे यावेळी सांगण्यात आले.
दि. २५ जानेवारी २०२१ रोजी फलटण नगर परिषद विशेष सभेत या कामाला आर्थिक व प्रशासकीय मंजूरी देण्यात आली असून त्यानंतर पुढील सर्व प्रक्रिया पूर्ण करुन आज या कामाचा प्रत्यक्ष शुभारंभ करण्यात आला आहे.
