वृक्षारोपण करताना सातारा जिल्हा परिषदेचे माजी अध्यक्ष व विद्यमान सदस्य श्रीमंत संजीवराजे नाईक निंबाळकर व इतर मान्यवर
सातारा जिल्हा परिषदेचे माजी अध्यक्ष व विद्यमान सदस्य श्रीमंत संजीवराजे नाईक निंबाळकर यांचे स्वागत करताना अविरत डेव्हलपर्स चे तुषार नाईक निंबाळकर व इतर मान्यवर
फलटण, दि. २२ : पृथ्वीची अवस्था वृक्षतोडीमुळे दिवसेंदिवस बिकट होत चालली आहे. पृथ्वीवरील वातावरणाचा तोल ढळत आहे. झाडे जंगले कमी झाली. ऑक्सिजनचे प्रमाण कमी झाले. काही शतकांपूर्वी पृथ्वीचा सुमारे ६० % भाग वनांनी व्यापलेला होता, सध्या पृथ्वीचा केवळ २१ % भागातच वने आहेत. निसर्गाच्या साखळीत इतकी गुंतागुंतीची चक्रे आहेत, की माणसाला ती चक्रे निर्माण करणे तर सोडाच, पण ती चक्रे मोडली तर दुरूस्त करणेही जमण्यासारखे नाही, म्हणूनच वृक्ष लागवड करण्यासोबतच वृक्ष संवर्धन ही काळजी गरज आहे. आगामी काळामध्ये वृक्ष लागवड करून वृक्ष संवर्धन करणे गरजेचे आहे. ही गरज ओळखूनच अविरत डेव्हलपर्सने वृक्ष लागवडी सोबत वृक्ष संरक्षणाची जबाबदारी सुध्दा घेतलेली आहे. त्यांचा हा उपक्रम अत्यंत स्तुत्य असुन आगामी काळामध्ये असे उपक्रम तालुक्यात प्रभावीपणे राबविण्याची गरज आहे, असे मत सातारा जिल्हा परिषदेचे माजी अध्यक्ष व विद्यमान सदस्य श्रीमंत संजीवराजे नाईक निंबाळकर यांनी व्यक्त केले.
फलटण येथील घडसोली मैदान येथे युवा उद्योजक रणजितसिंह भोसले व तुषार नाईक निंबाळकर यांच्या अविरत डेव्हलपर्सच्या माध्यमातून वृक्षारोपण कार्यक्रमाचे आयोजन करण्यात आलेले होते. त्या वेळी श्रीमंत संजीवराजे नाईक निंबाळकर बोलत होते. या वेळी फलटण एज्युकेशन सोसायटीच्या गव्हर्निंग कौन्सिलचे व्हाईस चेअरमन रमणशेठ दोशी, माजी नगराध्यक्ष व विद्यमान नगरसेवक पांडुरंग गुंजवटे, पंचायत समितीचे माजी सभापती दत्तात्रय गुंजवटे, श्रीराम सहकारी साखर कारखान्याचे संचालक महादेव माने, मधोजी हायस्कूलचे प्राचार्य बाबासाहेब गंगावणे, भाऊ कापसे, प्रशांत नाईक निंबाळकर, अमरसिंह देशमुख, रणजितसिंह नाईक निंबाळकर यांची प्रमुख उपस्थिती होती.
पृथ्वीच्या वातावरणातील उष्णता प्रचंड वाढली आहे. तापमान दिवसेंदिवस वाढतच चाललंय. उन्हाळा वाढतच चाललाय. उकाडा असह्य होऊ लागलाय. दरवर्षी थंडीचं प्रमाण कमी कमी होत चाललंय. पूर्वीसारखी थंडी पडतच नाही. पावसाचं प्रमाण घटलंय. पावसाची अनियमितता वाढली आहे. पाऊस कधी वेळेत पडतच नाही. पाऊस पावसाळय़ात कमी आणि अवेळीच जास्त पडतोय. एकीकडे ओला दुष्काळ, तर दुसरीकडे कोरडा दुष्काळ. अवकाळी पावसाचं प्रमाण वाढलंय आणि फायद्यापेक्षा नुकसानच वाढत चाललंय, ह्या सर्व गोष्टी मानवासाठी अपायकारक आहेत. त्या मुळे आगामी काळामध्ये फक्त वृक्ष लागवड न करता वृक्ष संवर्धन करणे ही सुद्धा काळाची गरज आहे, असे हि श्रीमंत संजीवराजे नाईक निंबाळकर यांनी या वेळी स्पष्ट केले.
पर्यावरणाचं संतुलन आपणच बिघडवलंय आणि पर्यावरणाचं संतुलन बिघडल्यानेच हे सर्व बिकट प्रश्न आज निर्माण झाले आहेत. पण पर्यावरणाचं बिघडलेलं संतुलन पूर्वपदावर आणण्याची नैसर्गिक क्षमता वृक्ष-वनांमध्ये आहे.हवेचे प्रदूषण कमी करून हवा प्रदूषणमुक्त करणे, हवेतील कार्बनडाय ऑक्साईडचे प्रमाण कमी करून ऑक्सिजनचे प्रमाण वाढविणे, जमिनीची धूप थांबविणे, पाणी जमिनीत मुरविणे व जमिनीतील पाण्याची पातळी वाढविणे, वातावरणातील तापमान वाढ कमी करणे, हवेत गारवा निर्माण करणे, पाऊस पडण्यासाठी आवश्यक व अनुकूल परिस्थिती तयार करून पर्जन्यमान वाढविण्यासाठी मदत करणे, ही सर्व महत्त्वाची कामे वृक्ष आणि वनांकडून पार पाडली जातात. युवा उद्योजक तुषार नाईक निंबाळकर यांनी वृक्ष लागवड व वृक्ष संवर्धनाचा हाती घेतलेला उपक्रम हा स्तुत्य असून आगामी काळामध्ये सर्वांनीच असे उपक्रम घेणे गरजेचे आहे, असेही श्रीमंत संजीवराजे नाईक निंबाळकर म्हणाले.
वृक्ष लागवडीची सक्ती करून यश मिळणार नाही, हे आता स्पष्ट झाले आहे. यासाठी या उपक्रमात सरकारी संस्था, बिगर सरकारी संस्था, वृक्षप्रेमी संघटना व जनतेलाही सहभागी करून घेणे आवश्यक आहे. सर्वसामान्य जनतेला वृक्षाचे मानवी जीवनातील व पर्यावरणातील महत्त्व पटवून देण्यासाठी योग्य उपक्रम राबवावेत. वृक्ष लागवड योजनेत जनतेचा सहभाग वाढवावा, असे मत माजी नगराध्यक्ष व विद्यमान नगरसेवक पांडुरंग गुंजवटे यांनी या वेळी स्पष्ट केले.
यावेळी अविरत डेव्हलपर्सच्या वतीने तुषार नाईक निंबाळकर यांनी उपस्थितांचे स्वागत केले व आभार मानले.