बारामती :
विद्या प्रतिष्ठानचे कमलनयन बजाज अभियांत्रिकी महाविद्यालय प्लेसमेंट, कौशल्य विकास, बौद्धिक मालमत्ता अधिकार, पेटंट, उद्योजकता व इनक्युबेशन या बाबींवर विशेष परिश्रम घेत असते. महाविद्यालयाने गेल्या तीन वर्षात ७०० विद्यार्थ्यांना नामांकित कंपन्यामध्ये नोकरीच्या संधी उपलब्ध करून दिल्या आहेत. महाविद्यालयात अभियांत्रिकी शिक्षणासोबत शालेय तसेच महाविद्यालयीन शिक्षक व विद्यार्थ्यांसाठी विविध उपक्रम राबविले जातात. Covid-19 च्या काळात महाविद्यालयाने एआयसीटीई व आयएसटीई मान्यताप्राप्त “Innovative Teaching-Learning Methods” या सहा दिवसीय रिफ्रेशर कार्यशाळेचे आयोजन ऑनलाईन पद्धतीने ७ ते १२ डिसेंबर २०२० दरम्यान केले होते. या दरम्यान विविध महाविद्यालयातील ९८ प्राध्यापकांना लाभ झाला. AICTE चे सचिव कर्नल वेंकट, तसेच ISTE चे अध्यक्ष डॉ. प्रतापसिंह देसाई व सचिव प्रा. विजय वैद्य यांनी कार्यशाळेच्या यशस्वितेबद्दल समाधान व्यक्त केले. याच धर्तीवर २२ एप्रिल ते २८ एप्रिल तसेच ६ मे ते १२ मे २०२१ दरम्यान दोन कार्यशाळांचे आयोजन करण्यात आले आहे. यात आयआयटी, कॉलेज ऑफ इंजिनिअरिंग पुणे, तसेच दर्जेदार तांत्रिक संस्था व विद्यापीठातील नामवंत संशोधक मार्गदर्शन करणार आहेत. संस्थेचे उपाध्यक्ष अॅड अशोक प्रभुणे, विश्वस्त सौ सुनेत्रा पवार, अॅड नीलिमा गुजर, प्राचार्य डॉ. राजनकुमार बिचकर यांच्या मार्गदर्शनात विभाग प्रमुख डॉ. अनिल हिवरेकर, प्रा. अनिल दिसले, प्रा. दीपक सोनवणे, प्रा. अनिल पाटील व सहकारी ही कार्यशाळा यशस्वी होण्यासाठी परिश्रम घेत आहेत.