सातारा दि.7 (जिमाका): केंद्र शासनाच्या महिला व बाल विकास विभागामार्फत बाल शक्ती पुरस्कार व बाल कल्याण पुरस्कार दिला जातो. या पुरस्कारासाठी 15 सप्टेंबरपर्यंत अर्ज करावेत, असे आवाहन जिल्हा महिला व बाल विकास कार्यालयाकडून करण्यात आले आहे.
बाल शक्ती पुरस्कार -: ज्या मुलांनी (वय-५ पेक्षा अधिक व १८ वर्षा पर्यंतच्या ) शिक्षण, कला, सांस्कृतिक कार्य, खेळ, नाविन्यपुर्ण शोध, सामाजिक कार्य, व शौर्य अशा क्षेत्रात विशेष नैपुण्यपुर्ण कामगिरी केलेली आहे त्यांना हा पुरस्कार दिला जातो.
बाल कल्याण पुरस्कार :
वैयक्तिक पुरस्कार -मुलांचा विकास, संरक्षण व कल्याण या क्षेत्रात कोणत्याही प्रकारचे वेतन अथवा मानधन न घेता मानसेवी उदात्त भावनेतून किमान ७ वर्षे काम करणा-या व्यक्तीस हा पुरस्कार दिला जातो.
संस्था स्तरावर- बाल कल्याण क्षेत्रात अपवादात्मक कार्य करणा-या संस्थेला हा पुरस्कार दिला जातो . संस्था पुर्णतः शासनाच्या निधीवर अवलंबून नसावी. बाल कल्याण क्षेत्रात किमान १० वर्षे सातत्यपुर्ण उत्कृष्ट कार्य करणारी असावी.
बाल शक्ती पुरस्कार सन २०२१ व बाल कल्याण पुरस्कार २०२१ करीता केंद्र शासनाने अर्ज मागविलेले आहेत. अर्ज हे www.nca- wed.nic.in हया संकेतस्थळामार्फत ऑनलाईन पध्दतीने स्विकारले जाणार आहेत. पुरस्कारांची माहिती संकेतस्थळावर देण्यात आलेली आहे.
