पंढरपूर शहरात पार्किंग व्यवस्था न करणाऱ्या बँका आणि जागा मालकांवर कारवाई करण्याची शिवबुध्द प्रतिष्ठानची मागणी

पंढरपूर दि. ७ : महाराष्ट्र राज्यातील लाखो भाविकांचे श्रद्धास्थान असलेले व १ लाखाहून अधिक लोकसंख्या असणाऱ्या आणि तीर्थक्षेत्र म्हणून नावलौकिक असणाऱ्या पंढरपूर शहरात दररोज येणारे लाखो भाविकांमुळे कायमच वर्दळ असते.  येथील स्टेशनरोड परिसर कायमच वाहने आणि पायी चालणारे नागरिक यामुळे हाऊसफुल्ल असतो. रोडवर व रोडनजीक अनेक नॅशनल बँका आणि नागरी बँकांनी आपली कार्यालये थाटली असून बँकांनी व जागा भाड्याने देणारे मालकांनी पार्किंग व्यवस्था न केल्याने वाहतुकीला अडथळा निर्माण होत असल्याने पार्किंग व्यवस्था करण्यात यावी अन्यथा बेमुदत ठिय्या आंदोलन करण्यात येणार असल्याचे निवेदन शिवबुध्द युवा प्रतिष्ठान यांनी पंढरपुर नगर परिषदेेला दिले आहे. 

पंढरपूर शहरात बँक ऑफ बडोदा, महाराष्ट्र बँक ,सेंट्रल बँक ऑफ इंडिया ,युनियन बँक ऑफ इंडिया ,स्टेट बँक ऑफ इंडिया ,माढेश्वरी अर्बन बँक ,सांगोला अर्बन बँक, कॅनरा बँक ,मर्चंट बँक पंढरपूर यासह अनेक बँकांचा समावेश असून या बँकांमध्ये ग्राहकांची सतत वर्दळ असते. ग्राहकांची  दुचाकी चारचाकी वाहने भर रस्त्यावर लावली जातात. यामुळे वाहतुकीस अडथळे निर्माण होतात .प्रसंगी वादही उद्भवतात. वाहतुकीमध्ये बेशिस्तपणा येऊन प्रसंगी अपघातही होतात. यामुळे करोडोंच्या उलाढालीसाठी आपली दुकाने थाटलेल्या बँकांनी त्यांची स्वतःची पार्किंग व्यवस्था करण्याचे आवश्यकता निर्माण झाली असल्याचे निवेदनात म्हटले आहे. 

पंढरपूर शहरातील प्रमुख रस्त्यावरील वाहतुकीत बेशिस्तपणा निर्माण करणाऱ्या गोष्टीस आळा घालण्यासाठी नगरपरिषदेने  बेशिस्त निर्माण करणाऱ्या संबंधित यांना कल्पना देवून 15 दिवसाच्या आत योग्य ती कारवाई करावी अन्यथा शिवबुद्ध युवा प्रतिष्ठान महाराष्ट्र राज्य संघटनेच्यावतीने पंढरपूर नगरपरिषदेसमोर बेमुदत ठिय्या आंदोलन करण्यात येणार असल्याचे निवेदन नगरपरिषदचे उपमुख्याधिकारी यांना दिले आहे. 

 रस्त्यावर होणाऱ्या पार्किंगला आळा घालण्यासाठी पंढरपूर नगरपरिषद प्रशासन यांनी समस्या निर्माण करणाऱ्या बँका,  संबंधित इमारतींचे मालक यांच्यावर कारवाई करावी अन्यथा यापुढे होणाऱ्या परिणामांना संबंधित यांना जबाबदार धरण्यात यावे असे निवेदनात म्हटले आहे.

 निवेदन देताना शिवबुध्द युवा प्रतिष्ठानचे संस्थापक अध्यक्ष संदिपराजे मुटकुळे, सोलापूर जिल्हाध्यक्ष परमेश्वर डांगे,सागर कदम,संभाजी बिग्रेडचे किरणराज घाडगे, संभाजी बिग्रेडचे शहराध्यक्ष स्वागत कदम,आकाश पवार, सुनिल आगवणे,अनंता पवार,वैभव निकम,विशाल शिंदे उपस्थित होते.