*कुटुंबातील व्यक्तींनी सर्वेक्षणासाठी सहकार्य करण्याचे आवाहन*
फलटण टुडे वृतसेवा (सातारा दि. 4 (जि.मा.का.:)-
भारत सरकार राष्ट्रीय सांख्यिकी कार्यालयाच्या धर्तीवर महाराष्ट्रातही ‘कुटुंबाचा आरोग्यविषयक होणारा खर्च’ या विषयावर सर्वेक्षण होणार आहे. या पाहणी अंतर्गत आयुक्त अर्थ व सांख्यिकी संचालनालय मुंबई कार्यालयामार्फत जानेवारी ते डिसेंबर २०२५ या कालावधीत गोळा करण्यात येत आहे, सर्वेक्षणाकरीता घरी येणाऱ्या अधिकारी व कर्मचारी याचेंकडुन कुटंब निवडीची प्रकीया, सर्वेक्षणाची माहिती समजून घेण्याची आणि आरोग्यविषयक खर्चासंबंधी योग्य व परिपुर्ण माहिती देण्यासाठी सर्व संबधित कुटुंबिय व संबंधित व्यक्तींनी सहकार्य करण्याचे आवाहन जिल्हा सांख्यिकी कार्यालयाचे उपसंचालक यशवंत थोरात यांनी केले आहे.
सर्वेक्षणामध्ये निवड झालेल्या कुटुंबाकडून गेल्या वर्षभरात आरोग्यावर होणाऱ्या खर्चाबाबत विस्तृत माहिती गोळा करण्यात येणार आहे. पाहणीनंतरच्या निष्कर्षातुन केंद्र व राज्य शासणास आरोग्य सेवा सुधारणे व नियोजनासाठी तसेच त्याबाबत धोरणे राबविण्यासाठी उपयुक्त माहिती मिळणार आहे.
ही पाहणी सर्व राज्यातील सर्व जिल्ह्यात होणार असून सर्वेक्षणाचा मुख्य उद्देश शासकीय व खाजगी रुग्णालयात, दवाखान्यात मिळणाऱ्या उपचारांवर खर्च, कुटुबांचा आरोग्यविषयक होणारा खर्च, सर्व वयोगटातील लसीकरण, गर्भवती महिलांना मिळणाऱ्या सुविधांचा तपशील आदी बाबींची माहिती गोळा करणे हा आहे. या सर्वेक्षणामध्ये कुटुंबाची निवड “एक वर्ष किवां त्यापेक्षा कमी वयाचे मुल असणारे कुटुंब आणि मागील एक वर्षामध्ये रुग्णालयामध्ये दाखल असणारी कुटुंबातील व्यक्ती यामधून करण्यात येणार आहे.या सर्व्हेक्षणाच्या निष्कर्षाचा उपयोग आरोग्य सेवा क्षेत्रात सुधारणा आणि सरकारच्या धोरणात्म निर्णयाची अमंलबाजावणीसाठी होतो. राष्ट्रीय तसेच राज्य पातळीवर प्रभावी निर्णय घेणे शक्य व्हावे म्हणुन माहितीची सत्यता गुणवत्ता अत्यंत महत्वाची आहे. नमुना तत्वावर निवडण्यात आलेल्या घटकातील कुटंबाकडुन प्राप्त माहितीवर आधारीत निष्कर्ष हे राज्यातील लोकसंख्येकरीता अंदाजित केले जातील.
