फलटण टुडे वृत्तसेवा (मुंबई, दि १७ ऑक्टोबर २०२६):-
प्रतिस्पर्ध्यांवर गुणांचा वर्षाव करत मुंबई पोस्टलने पी. डी. हिंदुजा संघाचा ६१-२९ असा धुव्वा उडवला, तर सेंट्रल रेल्वेने स्वामी समर्थवर मात करत शिवनेरी कबड्डी महोत्सवाच्या व्यावसायिक गटाच्या उपांत्यपूर्व फेरीत दिमाखात धडक दिली आहे. चढाईतील आक्रमकता आणि पकडीतील अचूकतेच्या जोरावर दोन्ही संघांनी स्पर्धेत आपली आगेकूच कायम ठेवली आहे. याशिवाय कुमार गटात अंकुर स्पोर्ट्स क्लब आणि गुड मॉर्निंग स्पोर्ट्स क्लबने उपांत्य फेरीत प्रवेश केला असून, महिला गटात मुंबई पोलीस महिला संघ आणि शिवशक्ती महिला संघाने दणदणीत विजय मिळवत आपले वर्चस्व सिद्ध केले आहे.
दादरच्या शिवनेरी सेवा मंडळाच्या वतीने भवानी माता क्रीडांगणात आयोजित करण्यात आलेल्या प्रतिष्ठित शिवनेरी कबड्डी महोत्सवाचे यंदा ५८ वे वर्ष आहे. या महोत्सवाला निखिल लॉजिस्टिक्सचे संचालक सुरेशभाई कदम यांचे संपूर्ण प्रायोजकत्व लाभले आहे. विविध गटांतील चुरशीच्या आणि अटीतटीच्या लढतींमुळे स्पर्धेतील रंगत दिवसेंदिवस वाढत असून क्रीडाप्रेमींचा उत्स्फूर्त प्रतिसाद मिळत आहे.
व्यावसायिक गटात खेळताना सेंट्रल रेल्वेने स्वामी समर्थ संघाचा ३६-१९ अशा १७ गुणांच्या फरकाने पराभव करत उपांत्यपूर्व फेरीत प्रवेश केला. सेंट्रल रेल्वेकडून आशीष नरवालने चढाईत, तर अरकम शेखने पकडीत अत्यंत प्रभावी कामगिरी केली. स्वामी समर्थतर्फे कुशल म्हात्रेने चढाईत, तर राहुल पाटीलने पकडीत विजयाकामी निकराचा प्रयत्न केला; मात्र सेंट्रल रेल्वेच्या नियोजनबद्ध व आक्रमक खेळापुढे त्यांना अपयश आले. व्यावसायिक गटातील अन्य एका सामन्यात मुंबई पोस्टलने पी. डी. हिंदुजा संघाचा ६१-२९ असा तब्बल ३२ गुणांच्या मोठ्या फरकाने पराभव केला. मुंबई पोस्टलकडून सौरभ पाटीलने चढाईत, तर संकेत सावंतने पकडीत दमदार खेळ करत संघाच्या विजयात मोलाचा वाटा उचलला. पी. डी. हिंदुजाकडून विनय लाड आणि साहिल निळे यांनी झुंज देण्याचा प्रयत्न केला, परंतु मुंबई पोस्टलच्या तुफानी आक्रमणापुढे त्यांचे आव्हान टिकू शकले नाही.
व्यावसायिक गटातील इतर लढतींमध्ये बीपीसीएल संघाने जे. जे. हॉस्पिटलचा ४१-१८ असा २३ गुणांनी पराभव केला, ज्यामध्ये अलंकार पाटील आणि प्रसाद यांनी उत्कृष्ट खेळ केला. तसेच, अत्यंत चुरशीच्या झालेल्या दुसऱ्या सामन्यात मुंबई महानगरपालिकेने (बीएमसी) बेस्टचा ४०-३२ असा आठ गुणांनी पराभव केला. बीएमसीकडून ऋतिक पाटील आणि अलकेश चव्हाण यांनी विजयात महत्त्वाची भूमिका बजावली.
कुमार गटाच्या उपांत्यपूर्व फेरीत अंकुर स्पोर्ट्स क्लबने यश क्रीडा मंडळाचा ५०-३५ (१५ गुणांनी) पराभव केला. अंकुरकडून साई केरूड आणि उपमरजीत यादव यांनी चमक दाखवली. दुसऱ्या लढतीत गुड मॉर्निंग स्पोर्ट्स क्लबने जय भारत सेवा मंडळाचा ३६-१९ असा पराभव करत उपांत्य फेरी गाठली. गुड मॉर्निंगकडून श्रवण पाटील व निलेश मोरे यांनी चांगली कामगिरी केली. आता उपांत्य फेरीत गुड मॉर्निंग स्पोर्ट्स क्लबची गाठ अंकुर स्पोर्ट्स क्लबशी पडणार आहे. महिला गटात मुंबई पोलीस महिला संघाने अमर हिंद मंडळाचा ३९-१३ असा २६ गुणांनी पराभव केला, ज्यामध्ये तृप्ती लांडगे व पूजा पाटील यांनी चोख कामगिरी बजावली. दुसऱ्या सामन्यात शिवशक्ती महिला संघाने विश्वशांती स्पोर्ट्स क्लबचा ४६-१० असा तब्बल ३६ गुणांनी पराभव करत आपला दरारा कायम ठेवला. शिवशक्तीकडून शुभदा खोत व अक्षता पाटील यांनी उत्कृष्ट खेळ केला.
संक्षिप्त धावफलक:
व्यावसायिक गट: सेंट्रल रेल्वे (३६) विजयी विरुद्ध स्वामी समर्थ (१९), मुंबई पोस्टल (६१) विजयी विरुद्ध पी. डी. हिंदुजा (२९), बीपीसीएल (४१) विजयी विरुद्ध जे. जे. हॉस्पिटल (१८), मुंबई महानगरपालिका (४०) विजयी विरुद्ध बेस्ट (३२).
कुमार गट: अंकुर स्पोर्ट्स क्लब (५०) विजयी विरुद्ध यश क्रीडा मंडळ (३५), गुड मॉर्निंग स्पोर्ट्स क्लब (३६) विजयी विरुद्ध जय भारत सेवा मंडळ (१९).
महिला गट: मुंबई पोलीस महिला संघ (३९) विजयी विरुद्ध अमर हिंद मंडळ (१३), शिवशक्ती महिला संघ (४६) विजयी विरुद्ध विश्वशांती स्पोर्ट्स क्लब (१०).
