सातारा दि.3 (जिमाका): राज्य शासनाच्या कोविड-19 संदर्भातील अनलॉक मोहिमे अंतर्गत दिलेल्या सुधारित सुचनेनुसार आंतरजिल्हा प्रवाशांच्या प्रवासावरील निबंध हटविण्यात आला असून सदर प्रवासासाठी आता वेगळ्या परवानगीची आवश्यकता असणार नाही. परंतू आंतरजिल्हा वाहतूक करताना खाजगी प्रवासी बसेस यांनी अंमलात आणावयाची मानक कार्यपध्दती शासनाने जाहीर केली असून खाजगी प्रवासी बस ऑपरेटर यांनी कोविड-19 महामारीच्या पार्श्वभूमीवर केंद्र व राज्य शासनाने तसेच परिवहन विभागाने निर्गमित केलेल्या निर्देशांचे तंतोतंत पालल करावे, असे आवाहन उपप्रादेशिक परिवहन अधिकारी संजय राऊत यांनी केले आहे.
महाराष्ट्र मोटार वाहन नियम 1989 च्या नियम 20(1)(x) मधील तरतुदीनुसार लोकसेवा वाहनांच्या प्रत्येक चालकाने आपले वाहन स्वच्छ व निर्जंतुकीकरण केलेल्या स्थितीत ठेवणे आवश्यक आहे. त्यानुसार कंत्राटी बस चालकाने त्यातून प्रवास करणारा पर्यटक गट बदलताना तसेच प्रवासाच्या
प्रत्येक दिवशी प्रवासी बसचे निर्जंतुकीकरण करावे. तसेच कंत्राटी बस चालकाने प्रत्येक फेरीअंती प्रवासी बसचे निर्जंतुकीकरण करावे.
बसेच आरक्षण कक्ष / कार्यालय, चौकशी कक्ष यांची वेळोवेळी स्वच्छता करावी. तसेच सदर ठिकाणी उपस्थित कर्मचा-यांनी कर्तव्यावर असताना मास्क, सॅनिटायझरचा वापर करावा. बसेस जिथे उभ्या राहतात त्या ठिकाणी गर्दी होणार नाही याची काळजी घ्यावी. मास्क परिधान न केलेल्या प्रवाशांना बसमध्ये प्रवेश देऊ नये. बसचे प्रवेशद्वाराजवळ सॅनिटायझर ठेवण्यात यावे. तसेच बसमध्ये प्रवाश्यांच्या वापरासाठी काही अतिरिक्त ठेवण्यात यावेत. बसमध्ये प्रवेश करणा-या प्रवाशांची थर्मल गनद्वारे तपासणी करण्यात यावी. एखाद्या प्रवाशास ताप, सर्दी, खोकला इत्यादी प्रकारची कोविड-19 आजाराची प्राथमिक लक्षणे दिसत असल्यास अशा प्रवाशांना बसमधुन प्रवास करण्यास प्रतिबंध करण्यात यावा.
कंत्राटी बस सिटींग वाहनांमध्ये प्रवासी एक आड एक पध्दतीने आसनस्थ होतील अशाप्रकारे प्रवासी वाहतुकीस परवानगी असेल. स्लिपर बस वाहनांमध्ये डबल बर्थवर एक प्रवासी तसेच स्वतंत्र सिंगल बर्थवर एक प्रवासी याप्रमाणेच वाहतुकीस परवानगी असेल. चालकाने प्रवासा दरम्यान जेवण / अल्पोपहार / प्रसाधन गृहाचा वापर या कारणाकरिता बस थांबविताना ती ठिकाणे स्वच्छ आहेत याची खात्री करावी. बसमध्ये चढताना व उतरताना तसेच खान-पानाकरिता व प्रसाधन गृहाच्या वापराकरिता प्रवासा दरम्यान बस थांबविली असताना प्रवासी शारिरीक अंतर पाळतील याची दक्षता घ्यावी. प्रवाशांना बसमध्ये कचरा फेकू देऊ नये, त्यांना कचरा कुंडीचा वापर करण्याच्या व बस स्वच्छ राखण्याच्या सुचना द्याव्यात.
प्रवासी बसचे निर्जंतुकीकरण करणे तसेच त्यांचे अभिलेखन ठेवणे याची जबाबदारी परवाना धारकाची असेल. केंद्र व राज्य शासनाकडून वेळोवेळी प्राप्त होणा-या निर्देशानुसार तसेच प्रशासकीय दृष्टिकोनातून उपरोक्त सुचना / कार्यपध्दतीत आवश्यकतेनुसार
सुधारणा करण्यात येईल. सदर बाबींची नागरिक व बस वाहतुकदार यांनी नोंद घ्यावी असे आवाहन करण्यात येते. सर्व खाजगी प्रवासी बस वाहतुक परवाना धारकांना सुचित करण्यात येते की, वरील सूचनांचे पालन न केल्यास परवाना धारकाविरुध्द मोटार वाहन अधिनियम 1988, केंद्रीय मोटार वाहन निरयम 1989, आपत्ती व्यवस्थापन कायदा 2005 मधील तरतुदीनसार उचित कायदेशीर कारवाई करण्यात येईल उपप्रादेशिक परिवहन अधिकारी श्री. राऊत यांनी कळविले आहे.