फलटण टुडे वृत्तसेवा ( फलटण , दि ९ सप्टेंबर २०२६):- अनुसूचित जाती (SC) प्रवर्गातील आरक्षणाच्या अ, ब, क, ड अशा उपवर्गीकरणाला विरोध करण्यासाठी फलटण येथे गुरुवार, दि. १० सप्टेंबर २०२६ रोजी ‘संविधान समर्थन उपवर्गीकरण विरोधी मोर्चा’ आयोजित करण्यात आला आहे. अनुसूचित जाती प्रवर्गातील विविध समाजबांधवांनी मोठ्या संख्येने या मोर्चात सहभागी व्हावे, असे आवाहन संविधान समर्थन मोर्चा समिती, फलटण यांच्या वतीने करण्यात आले आहे.
आयोजकांच्या म्हणण्यानुसार, अनुसूचित जाती प्रवर्गातील आरक्षणाचे उपवर्गीकरण झाल्यास विद्यमान आरक्षणाचे विभाजन होऊन त्याचा परिणाम विविध घटक जातींवर होऊ शकतो. विशेषतः शिक्षण, स्पर्धा परीक्षा, रोजगार तसेच पुढील पिढीच्या संधींवर त्याचा परिणाम होण्याची शक्यता असल्याची भूमिका आयोजकांनी मांडली आहे.
उपवर्गीकरणामुळे अनुसूचित जातींच्या आरक्षणात विभागणी होऊन सध्याच्या १३ टक्के आरक्षणाचे विविध भाग होऊ शकतात. त्यामुळे आरक्षणाच्या लाभावर परिणाम होण्याची शक्यता असल्याची चिंता बैठकीत व्यक्त करण्यात आली. संविधानिक हक्कांच्या संरक्षणासाठी समाजबांधवांनी जागरूक होऊन एकजुटीने मोर्चात सहभागी व्हावे, असे आवाहन यावेळी करण्यात आले.
दरम्यान, फलटण येथील डॉ. बाबासाहेब आंबेडकर स्मृती भवन, मंगळवार पेठ येथे झालेल्या बैठकीत अनुसूचित जाती प्रवर्गातील विविध घटक समाजांच्या प्रमुखांनी मोर्चात आपापल्या समाजातील नागरिक मोठ्या संख्येने सहभागी होणार असल्याचे एकमताने जाहीर केले. बैठकीस बौद्ध, चर्मकार, हिंदू खाटीक, बुरुड, हिंदू ढोर, होलार, वाल्मिकी-मेहतर-रुखी आदी समाजांचे प्रतिनिधी उपस्थित होते.
मोर्चाची माहिती
दिनांक : गुरुवार, १० सप्टेंबर २०२६
वेळ : सकाळी १०.३० वाजता
प्रारंभ : मंगळवार पेठ समाज मंदिर
मार्ग : मंगळवार पेठ → बारामती चौक → प्रांत कार्यालय
अनुसूचित जाती प्रवर्गातील सर्व समाजबांधवांनी मोठ्या संख्येने उपस्थित राहून संविधानिक हक्कांच्या संरक्षणासाठी एकजूट दाखवावी, असे आवाहन आयोजकांच्या वतीने करण्यात आले आहे.
