फलटण टुडे वृत्तसेवा :- वडले, ता. फलटण : येथील वडले माध्यमिक विद्यालयात श्रीमंत मालोजीराजे नाईक निंबाळकर जयंतीनिमित्त विद्यार्थ्यांसाठी प्रबोधनात्मक व्याख्यानाचे आयोजन करण्यात आले. मुधोजी महाविद्यालय, फलटण येथील प्रा. डॉ. आशिष जाधव यांनी श्रीमंत मालोजीराजे नाईक निंबाळकर यांच्या जीवनकार्यावर अभ्यासपूर्ण व प्रेरणादायी मार्गदर्शन केले.
यावेळी प्रा. डॉ. आशिष जाधव यांनी श्रीमंत मालोजीराजे नाईक निंबाळकर यांच्या जीवनातील विविध पैलू, सामाजिक व शैक्षणिक क्षेत्रातील योगदान, समाजहिताची भूमिका, कार्यनिष्ठा आणि त्यांच्या कार्यातून आजच्या पिढीने घ्यावयाची प्रेरणा याविषयी विद्यार्थ्यांना सविस्तर माहिती दिली. इतिहासातील कर्तृत्ववान व्यक्तिमत्त्वांचे जीवन व कार्य विद्यार्थ्यांसाठी प्रेरणेचा स्रोत ठरते. त्यांच्या विचारांचा आणि कार्याचा अभ्यास करून विद्यार्थ्यांनी आपल्या जीवनात शिस्त, प्रामाणिकपणा, कर्तव्यनिष्ठा व समाजाप्रती बांधिलकी ही मूल्ये जोपासावीत, असे आवाहन त्यांनी केले.
इतिहास हा केवळ भूतकाळ जाणून घेण्याचा विषय नसून वर्तमानाला दिशा देणारा आणि भविष्य घडविण्यास प्रेरणा देणारा मार्गदर्शक आहे. त्यामुळे विद्यार्थ्यांनी इतिहासातील थोर व्यक्तिमत्त्वांच्या कार्याचा अभ्यास करून त्यातून सकारात्मक विचार आणि प्रेरणा घ्यावी, असेही प्रा. डॉ. आशिष जाधव यांनी सांगितले.
कार्यक्रमाच्या अध्यक्षस्थानी विद्यालयाचे मुख्याध्यापक भोईटे सर होते. यावेळी विद्यालयातील शिक्षकवर्ग सोनवलकर सर, जाधव मॅडम, निगडे सर आणि विद्यार्थी मोठ्या संख्येने उपस्थित होते.
अध्यक्षीय मनोगतात भोईटे सर यांनी विद्यार्थ्यांच्या सर्वांगीण विकासासाठी अशा प्रकारच्या ज्ञानवर्धक व प्रेरणादायी उपक्रमांचे महत्त्व अधोरेखित केले. विद्यार्थ्यांनी आपल्या इतिहासाचा अभ्यास करून कर्तृत्ववान व्यक्तींच्या कार्यातून प्रेरणा घ्यावी आणि भविष्यात समाजासाठी उपयुक्त कार्य करावे, असे आवाहन त्यांनी केले.
प्रा. डॉ. आशिष जाधव यांच्या अभ्यासपूर्ण, ओघवत्या व प्रभावी व्याख्यानाला विद्यार्थ्यांचा उत्स्फूर्त प्रतिसाद मिळाला. विद्यार्थ्यांनी उत्सुकतेने व्याख्यान ऐकून श्रीमंत मालोजीराजे नाईक निंबाळकर यांच्या जीवनकार्याची माहिती जाणून घेतली. या उपक्रमामुळे विद्यार्थ्यांच्या ज्ञानात भर पडण्याबरोबरच त्यांच्यामध्ये इतिहासाविषयी आवड आणि सामाजिक जाणीव निर्माण होण्यास मदत झाली.
कार्यक्रमाच्या यशस्वी आयोजनासाठी विद्यालयातील शिक्षकवर्गाने सहकार्य केले. जाधव मॅडम यांनी आभार प्रदर्शन केले. त्यांनी प्रा. डॉ. आशिष जाधव यांचे विद्यार्थ्यांना मोलाचे मार्गदर्शन केल्याबद्दल विशेष आभार मानले. तसेच कार्यक्रमाचे अध्यक्ष, उपस्थित मान्यवर, शिक्षकवर्ग आणि विद्यार्थ्यांचेही त्यांनी आभार व्यक्त केले.
श्रीमंत मालोजीराजे नाईक निंबाळकर यांच्या जयंतीनिमित्त आयोजित करण्यात आलेले हे व्याख्यान विद्यार्थ्यांसाठी ज्ञानवर्धक, प्रेरणादायी आणि संस्कारक्षम ठरले.
